Ja dä Summer. Fascht all Tag s gliche Wätter: Warm, heiss, troche. Wasser hani treit. Jede Tag. Etappewiis Gmües, Stude, Obschtbäum gwässeret. Güsschanne um Güsschanne vom gsammlete, spärliche Rägewasser. Han scho Angscht übercho, dass mir die Güsschanne awachst. Wär scho chli ugschickt, han i dänkt. Wie Choche, Putze, Wösche oder Pfuuse mit dem Ahängsel? D Arme sind sicher länger worde. Und isch mir da nid es Buggeli gwachse? Villicht sett i lerä das Wassergfäss uf em Chopf z balanciere. E gradi Körperhaltig wär fascht garantiert, Schultere entlaschtet, d Ärm nid usgliiret. Aber villicht en platte Oberchopf.
